«Առաջին անգամ էինք միասին աշխատում». Գուրգեն Դաբաղյանի նոր տեսահոլովակի հերոսուհին նրա կինն է

Uncategorized

Երգիչ Գուրգեն Դաբաղյանն անակնկալ ունի իր երկրպագուների համար: Շուտով նա իր լսարանի դատին կհանձնի «Յար ջան» երգի հիման վրա նկարահանված տեսահոլովակը: Մանրամասները Գուրգենն առաջինը պատմել է Tert.am Life-ին:

«Յար ջան» երգը սիրային թեմայով է, ռիթմիկ է, պարային: «Երգի երաժշտության հեղինակը Մանե Հակոբյանն է, խոսքերինը՝ Ավետ Բարսեղյանը: Մոտ մեկուկես տարի է, ինչը երգը կա, բայց երկրում ստեղծված իրավիճակն այնպիսին էր, որ չէի կարող նոր երգ թողարկել: Որոշեցի, որ արդեն կարող եմ տեսահոլովակ նկարահանել, բայց դեռ հստակ չգիտեմ, թե երբ կլինի պրեմիերան»,- ասաց Գուրգենը:

Տեսահոլովակի ռեժիսորը Վահե Հարությունյանն է, այն նկարահանվել է Գյումրիում: «Տեսահոլովակի նկարահանման վայրն ընտրել է ռեժիսորը: Կարծում եմ այնտեղ տեսահոլովակին համապատասխան գեղեցիկ տեսարաններ կան, այդ պատճառով Գյումրին է հարմար գտել: Վահեն փնտրել է տարբեր քաղաքներում, նաև՝ Երևանում: Առաջին տեսահոլովակս չէ, որ Գյումրիում եմ նկարահանում: «Ոնց կսիրեի» երգի տեսահոլովակը ևս Գյումրիում ենք նկարահանել»,- պատմեց նա:

Երգչի խոսքով՝ տեսահոլովակն ունի սյուժետային գիծ: «Տեսահոլովակում կան տղայի և աղջկա հանդիպում, անակնկալներ հերոսուհու համար, որոնք ես եմ կազմակերպում: Տեսահոլովակի հերոսուհին կինս է՝ Իննան, սա նկարահանման նրա առաջին փորձն է: Ռեժիսորի հետ միասին ուղղակի հարմար գտանք, որ Իննան նկարահանվի, նա էլ հեշտ համաձայնեց: Ընթացքը բավականին հեշտ ստացվեց, առանձնապես բարդություններ չեղան: Կա նաև պարային տեսարան, որտեղ Իննան աղջիկների հետ է:

Քանի որ կինս նաև պարուհի է, ամեն ինչ ավելի դյուրին ստացվեց: Առաջին անգամ էինք միասին աշխատում, բայց անհարմարություն չենք զգացել»,- նշեց նա: Երգիչը նկատեց, որ տևական դադարից հետո այս տեսահոլովակը կարելի է վերադարձ համարել: «Նախորդ տեսահոլովակս նկարահանել եմ մոտ երկու տարի առաջ, այս տեսահոլովակով բարդ շրջանից հետո կարծես վերադառնում եմ: Եվս մեկ երգ կա, որի տեսահոլովակը շուտով կնկարահանենք, աշնանն էլ կլինի պրեմիերան: Վերադառնում եմ իմ ակտիվ գործունեությանը»,- եզրափակեց նա: